2023 թվականի հունիսին Երևանի պետական համալսարանի (ԵՊՀ) Արևելագիտության ֆակուլտետի մի խումբ համախոհ շրջանավարտների կողմից ստեղծվեց «Ex Oriente» Հայաստանի արևելագետների միությունը:
ԵՊՀ Արևելագիտության ֆակուլտետը համարվում էր նախկին Խորհրդային Միության և Արևելյան Եվրոպայի արաբագիտության, իրանագիտության և թուրքագիտության առաջատար դպրոցներից մեկը: Խորհրդային Միության փլուզումից հետո, ի շնորհիվ ֆակուլտետի ղեկավարության և մի շարք բազմավաստակ հայրենադարձ գիտնականների ջանքերի, արևելագիտության ֆակուտետի շրջանավարտները նպաստեցին ոչ միայն գիտության զարգացմանը, այլև հայկական պետականության և նրա ինստիտուտների կայացմանը: Նրանց ներդրումը հատկապես ակնառու է եղել նորանկախ Հայաստանի դիվանագիտական կադրերի ստեղծման գործում։
Ex-Oriente-ի նպատակը ձևավորվեց 2020 թվականի Արցախյան երկրորդ պատերազմից հետո: Պատերազմի հետևանքները, զուգորդված Հայաստանի և Արցախի կրթական համակարգում առկա խնդիրների հետ, մղեցին հիմնադիրներին համախմբելու բոլոր շահագրգիռ շրջանավարտների ընդգրկուն ներուժը և ներգրավել ու զարգացնել հայ ուսանողների կարողություններն ինչպես հետազոտական, այնպես էլ այլ գիտական ոլորտներում: Այս նախաձեռնության նպատակն է շրջանավարտների գիտելիքները, կարողությունները և բազմամյա փորձը ծառայեցնել Հայաստանին և Արցախին։